एहि बिधि खौजत बिलपत स्वामी मनहुँ महा बिरही अति कामी
पूरनकाम राम सुख रासी मनुज चरित कर अज अबिनासी
आगे परा गीधपति देखा सुमिरत राम चरन जिन्ह रेखा
कर सरोज सिर परसेउ कृपासिंधु रधुबीर
निरखि राम छबि धाम मुख बिगत भई सब पीर
तब कह गीध बचन धरि धीरा सुनहु राम भंजन भव भीरा
नाथ दसानन यह गति कीन्ही तेहि खल जनकसुता हरि लीन्ही
लै दच्छिन दिसि गयउ गोसाई बिलपति अति कुररी की नाई
दरस लागी प्रभु राखेंउँ प्राना चलन चहत अब कृपानिधाना
राम कहा तनु राखहु ताता मुख मुसकाइ कही तेहिं बाता
जा कर नाम मरत मुख आवा अधमउ मुकुत होई श्रुति गावा
सो मम लोचन गोचर आगें राखौं देह नाथ केहि खाँगेँ
जल भरि नयन कहहिँ रघुराई तात कर्म निज ते गतिं पाई
परहित बस जिन्ह के मन माहीँ तिन्ह कहुँ जग दुर्लभ कछु नाहीँ
तनु तजि तात जाहु मम धामा देउँ काह तुम्ह पूरनकामा
सीता हरन तात जनि कहहु पिता सन जाइ
जौँ मैँ राम त कुल सहित कहिहि दसानन आइ
गीध देह तजि धरि हरि रुपा भूषन बहु पट पीत अनूपा
स्याम गात बिसाल भुज चारी अस्तुति करत नयन भरि बारी
अबिरल भगति मागि बर गीध गयउ हरिधाम
तेहि की क्रिया जथोचित निज कर कीन्ही राम
कोमल चित अति दीनदयाला कारन बिनु रघुनाथ कृपाला
गीध अधम खग आमिष भोगी गति दीन्हि जो जाचत जोगी
सुनहु उमा ते लोग अभागी हरि तजि होहिं बिषय अनुरागी