मंगल भवन अमंगल हारी

Hare Rama

मंगल भवन अमंगल हारी  

द्रवउ सो दसरथ अजिर बिहारी

निज अनुभव अब कहउँ खगेसा बिनु हरि भजन न जाहि कलेसा
राम कृपा बिनु सुनु खगराई जानि न जाइ राम प्रभुताई
जानें बिनु न होइ परतीती बिनु परतीति होइ नहिं प्रीती
प्रीति बिना नहिं भगति दिढ़ाई जिमि खगपति जल कै चिकनाई

बिनु गुर होइ कि ग्यान ग्यान कि होइ बिराग बिनु
गावहिं बेद पुरान सुख कि लहिअ हरि भगति बिनु
कोउ बिश्राम कि पाव तात सहज संतोष बिनु
चलै कि जल बिनु नाव कोटि जतन पचि पचि मरिअ

बिनु संतोष न काम नसाहीं काम अछत सुख सपनेहुँ नाहीं
राम भजन बिनु मिटहिं कि कामा थल बिहीन तरु कबहुँ कि जामा
बिनु बिग्यान कि समता आवइ कोउ अवकास कि नभ बिनु पावइ
श्रद्धा बिना धर्म नहिं होई बिनु महि गंध कि पावइ कोई
बिनु तप तेज कि कर बिस्तारा जल बिनु रस कि होइ संसारा
सील कि मिल बिनु बुध सेवकाई जिमि बिनु तेज न रूप गोसाई
निज सुख बिनु मन होइ कि थीरा परस कि होइ बिहीन समीरा
कवनिउ सिद्धि कि बिनु बिस्वासा बिनु हरि भजन न भव भय नासा

बिनु बिस्वास भगति नहिं तेहि बिनु द्रवहिं न रामु
राम कृपा बिनु सपनेहुँ जीव न लह बिश्रामु

मुनि दुर्लभ हरि भगति नर पावहिं बिनहिं प्रयास
जे यह कथा निरंतर सुनहिं मानि बिस्वास

राम कथा गिरिजा मैं बरनी कलि मल समनि मनोमल हरनी
संसृति रोग सजीवन मूरी राम कथा गावहिं श्रुति सूरी
एहि महँ रुचिर सप्त सोपाना रघुपति भगति केर पंथाना
अति हरि कृपा जाहि पर होई पाउँ देइ एहिं मारग सोई
मन कामना सिद्धि नर पावा जे यह कथा कपट तजि गावा
कहहिं सुनहिं अनुमोदन करहीं ते गोपद इव भवनिधि तरहीं
सुनि सब कथा हृदयँ अति भाई गिरिजा बोली गिरा सुहाई
नाथ कृपाँ मम गत संदेहा राम चरन उपजेउ नव नेहा
मैं कृतकृत्य भइउँ अब तव प्रसाद बिस्वेस
उपजी राम भगति दृढ़ बीते सकल कलेस

यह सुभ संभु उमा संबादा सुख संपादन समन बिषादा
भव भंजन गंजन संदेहा जन रंजन सज्जन प्रिय एहा
राम उपासक जे जग माहीं एहि सम प्रिय तिन्ह के कछु नाहीं
रघुपति कृपाँ जथामति गावा मैं यह पावन चरित सुहावा
एहिं कलिकाल न साधन दूजा जोग जग्य जप तप ब्रत पूजा
रामहि सुमिरिअ गाइअ रामहि संतत सुनिअ राम गुन ग्रामहि
जासु पतित पावन बड़ बाना गावहिं कबि श्रुति संत पुराना
ताहि भजहि मन तजि कुटिलाई राम भजें गति केहिं नहिं पाई
पाई न केहिं गति पतित पावन राम भजि सुनु सठ मन
गनिका अजामिल ब्याध गीध गजादि खल तारे घना
आभीर जमन किरात खस स्वपचादि अति अघरूप जे
कहि नाम बारक तेपि पावन होहिं राम नमामि ते
रघुबंस भूषन चरित यह नर कहहिं सुनहिं जे गावहीं
कलि मल मनोमल धोइ बिनु श्रम राम धाम सिधावहीं
सत पंच चौपाईं मनोहर जानि जो नर उर धरै
दारुन अबिद्या पंच जनित बिकार श्रीरघुबर हरै
सुंदर सुजान कृपा निधान अनाथ पर कर प्रीति जो
सो एक राम अकाम हित निर्बानप्रद सम आन को
जाकी कृपा लवलेस ते मतिमंद तुलसीदासहूँ
पायो परम बिश्रामु राम समान प्रभु नाहीं कहूँ

मो सम दीन न दीन हित तुम्ह समान रघुबीर
अस बिचारि रघुबंस मनि हरहु बिषम भव भीर
कामिहि नारि पिआरि जिमि लोभहि प्रिय जिमि दाम
तिमि रघुनाथ निरंतर प्रिय लागहु मोहि राम

Hare Rama 

ईस्वर जीव भेद प्रभु सकल कहौ समुझाइ

Hare Rama

एक बार प्रभु सुख आसीना लछिमन बचन कहे छलहीना
सुर नर मुनि सचराचर साईं मैं पूछउँ निज प्रभु की नाई
मोहि समुझाइ कहहु सोइ देवा सब तजि करौं चरन रज सेवा
कहहु ग्यान बिराग अरु माया कहहु सो भगति करहु जेहिं दाया

ईस्वर जीव भेद प्रभु सकल कहौ समुझाइ
जातें होइ चरन रति सोक मोह भ्रम जाइ

थोरेहि महँ सब कहउँ बुझाई सुनहु तात मति मन चित लाई
मैं अरु मोर तोर तैं माया। जेहिं बस कीन्हे जीव निकाया
गो गोचर जहँ लगि मन जाई सो सब माया जानेहु भाई
तेहि कर भेद सुनहु तुम्ह सोऊ बिद्या अपर अबिद्या दोऊ
एक दुष्ट अतिसय दुखरूपा जा बस जीव परा भवकूपा।।
एक रचइ जग गुन बस जाकें प्रभु प्रेरित नहिं निज बल ताकें
ग्यान मान जहँ एकउ नाहीं देख ब्रह्म समान सब माही
कहिअ तात सो परम बिरागी तृन सम सिद्धि तीनि गुन त्यागी

माया ईस न आपु कहुँ जान कहिअ सो जीव
बंध मोच्छ प्रद सर्बपर माया प्रेरक सीव

धर्म तें बिरति जोग तें ग्याना ग्यान मोच्छप्रद बेद बखाना
जातें बेगि द्रवउँ मैं भाई सो मम भगति भगत सुखदाई
सो सुतंत्र अवलंब न आना तेहि आधीन ग्यान बिग्याना
भगति तात अनुपम सुखमूला मिलइ जो संत होइँ अनुकूला
भगति कि साधन कहउँ बखानी सुगम पंथ मोहि पावहिं प्रानी
प्रथमहिं बिप्र चरन अति प्रीती निज निज कर्म निरत श्रुति रीती
एहि कर फल पुनि बिषय बिरागा तब मम धर्म उपज अनुरागा
श्रवनादिक नव भक्ति दृढ़ाहीं मम लीला रति अति मन माहीं
संत चरन पंकज अति प्रेमा मन क्रम बचन भजन दृढ़ नेमा
गुरु पितु मातु बंधु पति देवा सब मोहि कहँ जाने दृढ़ सेवा
मम गुन गावत पुलक सरीरा गदगद गिरा नयन बह नीरा
काम आदि मद दंभ न जाकें तात निरंतर बस मैं ताकें

बचन कर्म मन मोरि गति भजनु करहिं निःकाम
तिन्ह के हृदय कमल महुँ करउँ सदा बिश्राम

Hare Rama